Oma Pajo

Oma Pajo on karjalazen pajon hora, kudai perustettih sygyzyl 1990. Horan repertuaras on enämbi 150 pajuo karjalan kielen eri murdehil da suomen kielel, karjalastu tansii da kižua. Oma Pajo on karjalazen pajon da karjalazen kul’tuuran säilyttäi da kehittäi. Horua tundietah ymbäri Karjalua da sen ulgopuolelgi: Ven’al da rajan tagua. Oma Pajo on yhtynyh monih kanzoinvälizih festivualiloih.

Perustandu

Oma Pajo perustettih Karjalan Rahvahan Liiton kehoitukses sygyzyl vuvvennu 1990. Horan perustajien joukos oldih Karjalan kuulužat karjalazet artistat Vieno Kettunen, Pekka Mikšijev, Jelena Kornilova. Vieno Kettunen da Jelena Kornilova pandih lehteh ilmoituksen karjalazen horan perustamizes, sit kylmykuus 1990 oli enzimäine Oman Pajon harjaitus, kudamah tuli 18 hengie.

Ohjuajat

1990–1996 – horan ohjuajannu oli Karjalan kul’tuurualan arvostettu ruadai Klara Stas’uk.
1996–1997 – Svetlana Gretskaja.
Vuvves 1997 algajen ohjuajannu on Karjalan kul’tuurualan arvostettu ruadai L’ubov Nikitina.

Soittajat

А. Riikkonen (1990—1991)
J. Išanin (1991—1997)
D. Muhorin (1997—1998)
I. Ledn’ov (1999-2017)

Pajattajat

Enimät Oman Pajon horalazet ollah karjalazet, heile karjalan kieli on muamankielenny. Monet horalazet iče kirjutetah pajoloin sanoi da kiänetäh pajotekstoi venän da suomen kielespåi.

Pajot

Hora pajattau perindöllizii karjalazii pajoloi da uuzii kirjutettuloi kaikil karjalan kielen murdehil da suomen kielel da kai udmurtien kielelgi.

Palkindot da arvonimet

Vuvvennu 1995 – Oma Pajo sai rahvahan horan arvonimen (hora tovendi sen vuvvennu 2000).
Oma Pajo on yhtynyh da suannuh diplomat monis kanzoinvälizis, Kogo Ven’an da tazavallan festivualilois.

Projektat

Pajon paja –projektu. Sidä todevutettih vuozien 2004-2005 aigah. Projektan tuloksennu rodih karjalankieline Terveh, pajo -pajokogomus, kudamat kai pajot ollah uvvet, projektan aigah kirjutetut.
Karjalaini stolaliina. Projektua todevutettih vuvvennu 2006 Kezriäjäzen inehmizet. Kezriäjäine on Oman Pajon tyveh perustettu pajojoukko. Projektan tuloksennu rodih kuvattu fil’mu.
Karjalazet. Perehen tarinat. Tädä projektua Oma Pajo todevutti vuvves 2008 algajen da sen aigah oli luajittu fil’mu ”Karjalazet. Perehen tarinat”

Diskat

Vuvvennu 2009 Karjalan rahvahan VI kerähmyö vaste nägi päivänvalgien Oman Pajon CD-disku.