Tamara Saveljeva
Tamara Saveljeva on karjalaine kiändäi da kirjuttai. Tamara Saveljevan kiännöksii da kirjutuksii alalleh painetah Oma Mua -lehteh da Taival-almanakkah.
| Tamara Saveljeva | |
|---|---|
| Ammatti: | писательница, переводчица, учёная, учительница |
| Roindukohtu: | |
Rodivundu kohenda
Tamara Saveljeva on roinnuhes voinan aigua Uutjärven Tyhjälän hieruh liygiläzien pereheh. Kazvoi suures perehes. Perehes kaikin dai kogo hierus paistih vaiku livvikse, hos ellendettihgi ven’ua. Tänäpäi Tamara Saveljeva eläy Piiteris.
Opastundu kohenda
Opastui Uutjärven, Vehkusellän, Kotkatjarven školis. Školan jälles piäzi opastumah Piiterin yliopistoh muatiijon tiedokunnale. Loppi aspirantuuran, väitti muatiijon kandiduatakse. Tutki suoloi, muan pindua aero- da sateliittikuvii myote.
Ruado kohenda
Ruadoi Piiteris suoloin tutkimuslaitokses da kosmossulaitokses.
Suomen kielen alal kohenda
Perestroikan aigah rubei opastumah suomen kieldy Vierahien kielien korgeiškolas, sai opastundas Jyväskylän yliopiston tovestuksen. Sida paiči suomen kielen nero on tulluh Uutjärven školaspäi, kus urokat oldih suomen kielel. Jo kaksikymmen vuottu Tamara Saveljeva on suomen kielen opastajannu. Tutkimuslaitoksis ruadajes ei unohtannuh kieldy, ku lugi lehtilöi suomen kielel, kudamii oli myödävänny Piiteris. Opasti suomen kieldy Piiteris suomi-ven’alazes litseis, nygöi - Talovusyliopistos.
Kiännösruado kohenda
Tamara Saveljeva kiändäy tundiettuloin ven’alazien runoilijoin runoloi da suarnoi. Suurimat kiännökset ollah Puškinan suarnat Kuldazes kalas, kudai oli painettu Omah Muah da lapsien Kipinä-žurnualah, Saltan suarih nähte, Kuldazes kukkizes. Kiännökses hyvin nägyy alguperäzen tekstan ritmu, muuzikku. Kiännökset on luajittu puhtahal karjalan kielel da hyvän rifman mugah.
Kiännöskniigat kohenda
- Vuvvennu 2015 piäzi ilmah Nikolai Karpinan Vottovaaran taru –kniigu ven’an da karjalan kielel. Karjalan kielen livvin murdehele suarnat kiändi Tamara Saveljeva. "Vottovaaran taru" on Nikolai Karpinan Kalevala-eeposan uuzi ellendämine. Häi kirjuttau sille oman jatkon.
- Vuvvennu 2016 piäzi ilmah Nikolai Karpinan Van’oihuon suarnua -kniigu kahtel kielel: ven’akse da karjalakse. Karjalan kielen livvin murdehele suarnat kiändi Tamara Saveljeva.