Revinnyh kottu

Revinnyh kottu on veškel’čoin pajojoukko, kudai pajattau karjalakse.

Perustandu

Revinnyh kottu on perustettu vuvvennu 2013. Sinä vuon kevättalvel Veškelykses piettih seminuaru ECHO-projektan hantuzis. Seminuarah tuli kuulužu pajattai da soittai Arto Rinne. Muuzikkumies nevvoi kyläläzii dai seminuaralazii oigies pajatandas, soitandas, laval olendas. Tämän jälgeh rodihgi kyläh vie yksi pajojoukko.

Nimen sellitändy

Mindäh on ”Revinnyh kottu”? Nimi on pättävy, mieleh painuu kerras. Veškel’čät sellitetäh, ku nimi löydyi kerras. Konzu allettih pajattua, ei heil nimidä, paiči virzuu, ei olluh. Segi ei olluh luja, paikkuandua kyzyi.

Pajattajat da soittajat

”Revinnyös kotas” pajattajua da soittajua on nelli – kolme miesty da yksi naine. Aleksei Čaikin – Veškelyksen etnokeskuksen piälikkö, Pavel Andrejev kyläškolan liikundan opastai, Maksim Malahovskii – lapsienke ruadai da kylän piälikkö Irina Pogrebovskaja.

Pajatandu

”Revinnyh kottu” pajattau karjalakse. Pajatetah uvvembii kirjutettuloi pajoloi da vahnoigi perindöllizii. Joukko on käynnyh pajattamah karjalazih kylih da rajan tuakse Suomeh.