Paavo Ahava
Paavo Ahava (Pavel Sem’onovič Afanasjev, 17. talvikuudu 1872, Uhtua – 31. talvikuudu 1944, Helsinki) oli karjalaine kupču da kuulužu yhteskunnnalline ruadai, kudai oli Vienan Karjalazien Liiton (Karjalan Sivistysseuran) alguhpanijoin joukos.
| Paavo Ahava | |
|---|---|
 | |
| Ammatti: | kupču, yhteskunnnalline ruadai |
| Rodivui: | 17. talvikuudu 1872 |
| Roindukohtu: | Uhtua |
| kanzalližus: | |
| Kuoli: | 31. talvikuudu 1944 |
| Kuolendukohtu: | Helsinki |
| Lapset: | Iivo Ahava[d] |
Paavo Ahava oli rodinuhes Uhtuol. Suomeh muutti vuvvennu 1883. Vuvves 1887 ruadoi myöjänny Tornionlaakson Turtolas. Vuvvennu 1900 Ahava avai oman laukan Kuusamoh. Vuozinnu 1900 Ahava rubei kehittämäh omua ruaduo Oulus da Uhtuol.
13-vuodizennu Ahava lugi A.V. Ervastin Mustelmat matkas Ven’an Karjalah kezäl 1879 (Muistelmia matkalta Venäjän Karjalassa 1879) – nimizen kniigan. Jo silloil hänel rodih mieli elvyttiä karjalastu ičentunduo. Monen vuvven peräs Ahava rubei keriämäh kniigua kniigoinpiästäjis. Se autoi avata Uhtuol enzimäzen kirjaston keviäl vuvvennu 1889. Vuozien 1900 allus Ahava rubei nostamah karjalastu ičentunduo. Vuozinnu 1905-1906 häi pidi Uhtuol da Vuokkiniemes kanzalliskerähmölöi. Vuvvennu 1906 Ahava johti Vienan Karjalazien Liiton perustuskerähmyö. Se oli pietty Vaasas.
Vuvvennu 1907 päiväzenvalgien nägi Ahavan toimitettu kanzalliskieline aberi. Vuvvennu 1908 Ahava pani rattahil kursit vienankarjalazih niškoi. Niilöi piettih Kuusamon rahvahanopistos. Yhtes Paavo Ahavanke johtamas Vienan Karjalazien Liittuo oldih Aleksei Mitro, Timo Manner da Iivo Härkönen. Paavo Ahava oli Karjalaiset Pakinat da Toukomies-lehtilöin toimittajannu. Nämmien lehtilöin jälles ruvettih piästämäh ilmoih Karjalan Heimo-žurnualua. Vuvvennu 1917 Vienan Karjalazien Liiton edustajannu olles Ahava ajeli Karjalan kylii myö, kus järjesti kirjastoloin da školien ruaduo. Liiton uvvekse nimekse tuli Karjalan Sivistysseuru. Samannu vuonnu yhtes Iivo Härközenke Ahava luadi Karjalan avtonoumiiohjelman, kuduadu voibi pidiä Päivännouzu-Karjalan enzimäzenny peruszakonannu.Suomen sizävoinan aigua keviäl vuvvennu 1918 Ahava kehitti ajatustu liittiä Päivännouzu-Karjal Suomeh da aktiivizesti kuhkutti sih rahvastu. Hänen poigu Paavo Ahava kannatti tädä ajatustu da kävyi kaikkih matkoih Päivännouzu-Karjalah vuozinnu 1918-1922. Paavo Ahavan vahnin poigu Iivo oli liittämisty vastah, häi nägi Päivännouzu-Karjalan iččenäzenny. Iivo, hänen tuatto da velli taisteltih eri puolil. Voinan aigua Paavo Ahava puutui vangih, yhtellän Iivon avul terväh oli piästetty järilleh Kuusamoh. Voinan jälles vuodessah 1920 Paavo Ahava ruadoi Päivännouzu-Karjalan toimituskunnas. Tämä kundu oli hävitetty Tarton rauhansobimuksen allekirjutettuu. Karjalan Sivistysseuran johtokunnas Ahava ruadoi vuodessah 1930.
Paavo Ahaval oli kuuzi lastu: Iivo (1896-1919), Paavo Paavonpoigu (1898-1981), Veera (1899–1981), Simo (1906–1942), Nikke (1910–1955) da Viena (1918–1992).