Jeuropan riäpöi

Jeuropan riäpöi (lat. Goredonus albula) — Riäpöikalat ollah siigoin roduu, eletäh suolattomas vies.

Jeuropan riäpöi

Riäpöikala ei ole suuri, voibi olla 13-20 sentii, erähät kazvetah 35 sentissäh. Riäpöi omal nävöl pohodiu sel´odkah. Rungo bokispäi ongu näpistetty, alimaine leuguluu on pitkembi ylimästy. Alimazeh leuguluuh syndyy sangevunnuh ylimäzen leuguluun n´okku. Suomuksii on suuri miäry (bokkii myö voibi olla 91-96 suomustu). Sellän väri on harmuan- sinine, vačču – valgei, sellän da hännän evät olah harmuat. Muut rungon kohtat ollah valpahat libo valgiet.

Riäpöit eletäh enimyölleh järvilöis, harvah – jogilois. On niidy kalastajat pyvvetty Botniekan da Suomen lahtilois Baltiekan meres. Parembi eländykohtu riäppölöil on puhtas hiekku libo savi järvenpohju. Kalaparvi järvilöis pyzyy syväl kohtal, ei suvaiče lämmiä vetty. Riäppölöi enimyölleh pyvvetäh Ven´an pohjozes da Suomes (69%), Skandinaavies, Daanies, Litvas, Valgoven´al, Germuanies da Šotlandies.

Ven´al riäpöit eletäh suuris järvilöis: Oniegan, Luadogan, Čudskoin, Pleščevan da Valgies meres. Kalastajat ei kačota riäpölöin pienevyöh, niile ainos löydyy pyydäjiä. Riäpöi pädöy rahvahan syöndystolal tuorehennu, suolatunnu da savvutunnu. Kaikin kalanmuagarit suvaijah riäpölöin mähändöi. Riäpöit ongen ankuriloih puututah harvah. Enimyölleh niidy pyvvetäh kalastushommujat verkoloil.