Hiihtoammundu

Hiihtoammundu (ammunduhiihto libo biatlon) on talvisportulaji, kuduas yhtistytäh muastohiihto da ammundu. Nengomii kilboi pietäh aiguhizien kesken.

Individualine kilbu

Individualizen kilvan matkan piduhus on miehil 20 kilometrii da naizil 15 kilometrii. Kilbailijat lähtietäh matkah yksitellen 30 sekundan välil. Individualizeh kilbah kuuluu nelli ammundua. Ezmäi ammutah virujen, sit seizoi, jälles sidä myöstin virujen da lopukse seizoi. Jogahizes siiriči ammundukerras hiihtoaigah ližätäh yksi štruafuminuuttu.

Sprintu

Sprintan (libo pikamatkan) piduhus on miehil 10 kilometrii da naizil 7,5 kilometrii. Kilbailijat lähtietäh matkah yksitellen 30 sekundan välil. Sprintah kuuluu kaksi ammundua. Ezmäi ammutah virujen, sit seizoi. Jogahizes siiriči mennyös ammundukerras pidäy kierdiä yksi 150 metrin štruafukierros.

Taga-ajo

Taga-ajos kilbailijat lähtietäh matkah sprintan tuloksien da aigueroloin mugah. Vaihtoehtonnu voi olla individualizen matkan tuloksien puolitetut erot. Sprintan voittai lähtöy enzimäzenny, toine toizennu da muga ielleh. Kilbah piäzöy kaikkiedah 60 sprintan parastu kilbailijua. Matkan piduhus on miehil 12,5 kilometrii da naizil 10 kilometrii. Taga-ajoh kuuluu nelli ammundua. Kaksi enzimästy ammutah virujen da kaksi jälgimästy seizoi. Jogahizes siiriči mennyös ammundukerras kilbailijal pidäy kierdiä yksi 150 metrin štruafukierros.

Yhteslähtö

Yhteslähtökilvas (kučutah vie mass-startakse) kilbailijat lähtietäh matkah yhtel aigua. Miehet hiihtetäh 15 kilometrii da naizet 12,5 kilometrii. Kilbumuodoh kuuluu nelli ammundua, kudamis kaksi enzimästy suoritetah virujen da kaksi jälgimästy seizoi. Jogahizes siiriči mennyös ammundukerras pidäy kierdiä yksi 150 metrin štruafukierros. Kilbah piäzöy muailman kubkan kogonaskilvan sen hetken 25 parastu da vie viizi sen kilbuviikon parastu kilbailijua. Tämä tarkoittau sidä, gu kaikkiedah kilvas on 30 kilbailijua. Gu kentahto ei ottane ozua kilbah, joukkuo tävvendetäh muga, gu 30 kilbailijua lähtis matkah. Enne kilbah piäzi suorah muailman kubkan 30 parastu kilbailijua. Siändyö muutettih kavvel 2010–2011.